Crita Fiksi lan unsur Intrinsikipun
Wacan ing ngisor iki wacanen kang titi!
T O P E N G
Dening : Oemaryanto
Buntelan sing diwadhahi tas kresek ireng iku dicepitake ing boncengan buri. Lawang omahe digembok banjur nggenjot sepedhah jengkine urut dalan padesan. Ora suwe wis tekan dalan gedhe jurusan Jombang – Kandhangan, sing isih sepi saka kumliwere kendharaan. Sauntara ing brang wetan, sunare surya wiwit sumamburat abang.
Alon-alon Syahri mancal sepedhahe. Saka omahe ing Kandhangan nguon-ngidul parane. Dina iki sing dituju pasar Pamenang – Pare. Simbah saka putu lanang siji thil iki suthik dikalahake karo umur. Kisut tuwa lan krenggosane napas dudu pepalang kanggone Syahri kanggo ngisi dinane kanthi tangi isuk lan tumandang gawe sadurunge srengenge njedhul.
“Ayo, Dhik Kasun. Aku dhisik…” sapane marang Kasun Parno sing lagi ngenteni bojone ing ngarep wartel Mawar. Sing disapa mlengos, mbuwang panyawang karo ethok-ethok ora krungu. Syahri ora kaget. Batine mung mesem. Wis ngira yen sapa aruhe bakal ora dipaelu. Mulane dadi uwong gak usah neka-neka, batine maido tanggane iku. Kurang luwih seminggu kepungkur Kasun Parno mampir omahe. Saka bale desa, sebab panas banjur ngisis ing emper lungguh lincak ngarepan omahe Syahri sing pancen isis. Kebeneran awan iku Syahri lagi ngresiki topeng-topeng tinggalane wong tuwane. Topeng-topeng iku wis tuwa. Kayune ireng nggales, kelir lan cete akeh sing wis burem. Biyen ana sing arep nuku, nanging ditulak. Senajan ajine ora sepira nanging topeng-topeng iku kabeh dianggep warisane kulawarga. Mung loro sing gaweyane Syahri dhewe.
Garapane kasar, wangune kaya badhut, pating pendhosol kaya wong lahi ngenyek lan nyungir. Ing burine ana kain kanggo nutupi sirah. Dadi sapa bae sing nganggo topeng iku ora bakal diweruhi sapa sing ana walik topeng iku. Iya topeng badhut rai abang lan ireng iku sing saben dina diajak makarya mbarang turut pasar.
“Topeng kaya badhut iki kok beda karo liyane, Kang?” pitakone Kasun Parno nyekel topeng badhut praen abang.
“Iya, wong gaweyanku dhewe. Bahane saka kayu waru. Takgarap sabisaku, sing penting ngrejekeni,”
“Saka kelire isih anyar ya, Kang?”
Syahri banjur nerangake yen nggawene rong taun kepungkur sawise Karmidi anake rabi lan boyong menyang Bogor kae.
“Wah, bolongane mripat kurang amba, Kang iki,” kandha ngono Kasun Parno karo njajal topeng badhut sing praen ireng.
“Ora apa-apa, Dhik. Nganggo topeng iku bisa weruh kanyatan tanpa disumurupi dening liyan,”
“Maksude, Kang?”
“Nalika takenggo nyambut gawe mbarang turut toko, ora nyana aku weruh salah siji prangkat desa sing lagi boncengan karo wanita liya…” kandhane Syahri isih karo ngelapi topeng-topenge.
“Sapa? Sampeyan nate weruh sapa, Kang?” Kasun Parno kandha lirih karo nyedhaki lungguhe Syahri sing mung ana dhingklik ngisor iku.
“Pokoke ya prangkat desa, sing mesthine dadi contone warga. Wanita sing dibonceng dudu bojone. Kira-kira ya… wong digonceng ki sajak mesra banget. Ndadak lendhetan barang neng pundhake sing bonceng…”
Durung tutuk olehe crita Kasun Parno ngadeg nyat lan njaluk pamit kesusu banget.
“Lho, Dhik.. bukune kari.. iki lho…”
Sepisan maneh Syahri mesem. Sepedhah jengkine digenjot alon sajak tanpa sanggan. Akeh sing wis disumurupi. Akeh wong sing wis dikonangi. Mulane ngamen topeng badhut iku ditlateni. Ora mung asile nanging pengalaman-pengalaman sing bareng tuwa iku bisa nguwatake imane, nggedhekake rasa syukur marang Gustine.
Tekan buk pinggir kali ana sawetara pemudha lagi cangkruk. Ana sing nggawa gitar lan ketipung. Sajake lagi ngenteni liwate bis esuk.
“Ayo, Mas. Menyang pasar ora?”
Nadyan sapa aruhe iku mau cetha dirungu, nanging para mudha iku ora ana sing wangsulan. Salah sijine sing klambi kothak-kothak malah mentheleng sajak nyimpen dendam. Syahri ngguyu plengeh. Mulane nyambutgawe ing pasar sing bener, Le, batine.
Telung dina kepungkur Syahri lan topeng badhute ngonangi klambi kothak-kothak mau nyopet ing pasar Peterongan. Nalika dheweke wiwit ngamen, tetembangan karo nauh terbang cilik. Sirahe lenggut-lenggut awake obah manut wiramane lagu. Lho kok dumadakan ana pemudha loro melu suk-sukan ing antarane ibu-ibu sing blanja. Sing klambi kothak-kothak banjur ngetokake silet. Tas kulit iku suwek kena silet. Isine diodhos-odhos. Dhompet, hp, dicopet lan kanthi cepet dilungake kancane. Sing nampani enggal sumingkir ngadoh saka kerameyan.
Ora suwe kedadeyane. Ibu-ibu sing kecopetan bengok-bengok. Pemudha klambi kothak-kothak iku nyingkir mbalik dalan. Saking kesusune nubruk Syahri sing wis tekan burine. Pemudha iku mandheg sedhela. Mripate menthelengi Syahri sajak ngincim, ora sah melu cawe-cawe. Sing dipenthelengi mung mesem. Naning eseme ora ketok sebab ketutupan topeng badhut ireng.
Dina iki topengku weruh sapa nyopet lan sapa sing dicopet tanpa bisa tumindak apa-apa. Mulane sing klambi kothak-kothak ing pinggir dalan iku mentheleng tajem nalika disapa Syahri. Salahmu dhewe, Le, batine Syahri.
Wusana Syahri tekan ing pasar Pamenang sing wis wiwit rame dening umyeke wong dol tinuku. Sepedhah jengkine dituntun lan dititipake ing warung langganane. Buntelan ing tas kresek dijupuk nuli jumangkah tumuju toilet. Sepuluh menit sabanjure Syahri wis njedhul saka toilet. Sandhang penganggone wis salin. Klambine tambal-tambal nganti sadhengkul dawane. Wetenge mblendhuk, nganggo topeng badhut lan nyekethem terbang cilik. Banjur terbang ditabuh, lambene wiwit nembang ing sangarepe bakul. Dhuwit klithik pawewehe bakul lan uwong sing padha welas dilebokake ing kanthong klambi sing sengaja digawe luwih gedhe.
Uga ana bakul sing ora menehi tur malah grenengan. Syahri ora ngresula. Saumpama Syahri arep mecucu apa ngece-ece uga ora ana sing ngerti sebab kabeh mau ketutupan topeng badhut rai ireng iku.
Tekan bakul pracangan sisih pojok kidul jangkahe Syahri kandheg. Anggone tetembangan saya lirih. Sirahe menga-mengo. Swarane terbang uga wis ora pati ana wiramane. Saka walike topeng Syahri weruh ana sawenehing wanita lagi blanja karo nggandheng anake lanang sing isih cilik. Wanita iku ditamatake. Jebul Hardini, mantune dhewe sing kudune ana ing Bogor kana. Kapan olehe bali? Dhadhane Syahri tratapan. Sauntara bocah cilik iku wiwit wedi. Bocah iku wedi marang topeng badhut praen ireng sing dianggo Syahri.
“Ora sah wedi,.. ora apa-apa kok!” kandhane ibune semu kudu ngguyu. Syahri mundur alus. Dheweke enggal metu saka jero pasar. Nuli lenger-lenger ing trotoar ngisor wit waru. Topenge isih dienggo, jantunge isih dheg-dhegan. Apa mantuku iki entuk cuti saka pabrik? Dheweke bali dhewe apa bareng karo Karmidi? Kapan tekane? Apa Hardini njujug omahe wong tuwane ing kana? Pikirane Syahri saiki umyek, kaya umyeke wong-wong ing pasar.
Saploke Karmidi, anake lanang rabi entuk Hardini lan nyambutgawe ing Bogor kana, Syahri pancen arang-arang banget ketemu. Mung setaun sepisan, yen dhong riyayan. Sauntara Syahri sing lumuh nganggur iku, uga ora tau krasan yen mung meneng ana omah. Dheweke uga suthik yen mung njagakake kiriman blanja saka Karmidi. Sedhenge tenaga tuwane wis ora kuwat nyandhak pegaweyan kasar. Mula banjur nekad ngamen turut dalan, turut pasar.
Pegawayan iku ora dingerteni dening anake lanang uga mantune si Hardini. Anggone ngamen nganti tekan puluhan kilometer adohe saka desane. Tangga teparone wae arang sing ngerti yen Syahri iku pengamen. Malah ora sithik sing ngira yen dheweke iku bakul topeng. Lan dina iki anggone ngamen jebul adhep-adhepan karo mantune dhewe. Muga-muga bae dheweke ora ngerti.
“Topeng nakal!” aloke bocah cilik saka burine Syahri.
Klothak! Tangane bocah cilik iku nyampe topenge Syahri. Karet sing nyanthol ing kupinge pedhot, topenge coplok lan ceblok ing pangkone Syahri. Syahri gragapan kaget.
“Lho?…Pak! Njenengan kok… ” aloke Ibune si bocah mau semu ora percaya. Syahri klincutan. Lambene rinasa abot ora bisa guneman. Dipeksa mesem kanggo nutupi isin, tetep ora bisa. Sedhenge wanita sing ora liya Hardini iku jumangkah nyedhak, batine isih ora percaya karo apa sing dinulu.
“Sepurane…Ndhuk…,” guneme Syahri kaya kolu ing gorokane. Topenge saiki ngglundhung ing lemah.
Topenge sing gumlethak neng lemah dijupuk. Topeng sing dianggep bisa weruh kasunyatan tanpa disumurupi liyan, topeng sing bisa gawe seneng lan wedine liyan, topeng sing bisa dijak nyambutgawe. Topeng sing sasuwene iki bisa kanggo ndhelik saka kanyatan, jebul dina iki wis miyak wadine dhewe.
*****
(Jaya Baya 12, 2005 : 28 – 19)
1. Crita Fiksi
Crita fiksi punika nggadhahi teges khayalan.
Crita fiksi punika ing sastra Jawi kathah sanget, ing sastra tulis umpamini pun crita cekak (cerkak), roman sacuwil, wacan bocah, alaming lelembut, crita sambung, kalebet ugi crita rakyat.
Ing pundi saged dipun panggihi crita fiksi sastra Jawi? Ing jaman sapunika gampil sanget. Ing majalah utawi kalawarti basa Jawi, ugi ing buku-buku terbitan saking karya sastra jawi kalawau.
Cerkak punika kalebet crita fiksi. Cerkak saking tembung crita cekak, inngih punika karangan awujud gancaran ingkang ringkes tur padhet, maksudipun nyariyosaken kedadosan saking wiwitan ngantos wekasan kanthi cara ingkang ringkes utawi cekak. Cerkak punika keunggulan ipun senaosa ringkes nanging isinipun saged nabet ing manah.
2. Unsur Intrinsik crita fiksi
Saben jenis karya sastra punika nggadhahi kaendahan. Kaendahan kalawau dipun wangun saking struktur sastra ingkang wonten ing salebeting karya punika piyambak. Struktur sastra punika dipun wastani ugi unsur intrinsik karya sastra. Kangge karya sastra jenis crita (gancaran) strukturipun ing antawisipun inggih punika :
a. Tema = inggih punika ide pokok utawi gagasan pokok ingkang dados sumber lan dhasar penulisan cerkak. Kangge mangertosi tema ing cerkak, pamaosipun boten namung sepisan nanging bola-bali lan dipun mangertosi kekajengan ipun pengarang lumantar karyanipun.
b. Plot utawi alur inggih punika reroncening kedadosan ingkang sambung-sinambung salebeting cariyos.
Plot limrahipun nggadhahi urut-urutan
– bebuka, nalika pengarang wiwit nggambaraken cariyos ; kenalan. Pengarang wiwit nggandheng prastawa satunggal lan prastawa sanesipun ingkang saged nyebabaken wontenipun gesehing panemu (konflik) salebeting cariyos.
– pradondi, kahanan ing nalika gesehing panemu (konflik) kalawau sansaya nemen raosipun. Sedaya prastawa ing cariyos ngalami pamuncakipun.
– panutup, nalika pengarang akhiripun mungkasi cariyos lan nutup sedaya prastawa ingkang wonten.
Alur utawi plot punika wonten ingkang ngginakaken alur maju, alur mundur, alur rapet, alur renggang, alur maju-mundur, lsp.
c. Wewatakan (penokohan) inggih punika wewatakanipun para paraga ingkang wonten ing cariyos. Wewatakaning para paraga punika saged dipun tingali saking :
– gambaran wujud lairipun; wonten ingkang ayu, bagus, enom, tuwa, uwanen, cacad, lsp.
– pikiranipun paraga, badhe tumindak sae, mikir awon, lsp.
– gambaran langsung, pengarang nyariyosaken watakipun paraga.
– basanipun lan wicantenipun
– saged ugi saking kahanan kamaripun, pakulinanipun, caranipun ageman. Lsp.
d. Latar, Setting
Latar utawi setting punika saged arupi papan panggenan lan wekdal kedadosan ingkang wonten ing salebeting karya sastra. Saking papan panggenan lan wekdal punika pengarang nggambaraken swasananing kedadosan, ngantos-ngantos penikmat – pamaos kados tumut ing salebeting cariyos kalawau.
e. Amanat inggih punika piweling ingkang kinandhut wonten ing karangan. Amanat saged arupi pitutur, pamrayoga, pangajak ngantos dumugi kritik/panyaruwe.
f. Kaendahaning Basa, inggih punika basa ingkang dipun ginakaken ing cariyos. Taksih netepi unggah-ungguh basa, nggunakaken basa lokal (dialek), utawi ugi rerenggan basa sanesipun.
g. Point of view/sudut pandang inggih punika kalenggahan pengarang wonten ing salebeting cariyos. Wonten sudut pandang wong kapisan (utama purusa), lan sudut pandang wong ka-telu/pratama purusa. Ing sudut pandang wong kapisan, pengarang wonten ing salebeting crita kanthi langsung. Saged dados paraga utama, saged ugi namung dados paraga tambahan.
3. Kawruh Basa
– Dasanama; dasa = sepuluh, nama = aran
Tembung dasanama yaiku tembung kang duweni teges pirang-pirang utawa padha tegese = sinonim.
Tuladha dasanama ing ngisor iki pahamana kanthi tliti!
1. Anak : atmaja, suta, siwi, sunu, yoga, putra
2. Angin : bajra, bayu, maruta, samirana, sindung, riwut, pawana
3. Ati : driya, galih, manah, kalbu, nala, prana, tyas, wardaya.
4. Awak : angga, badan, sarira, salira, raga.
5. Banyu : toya, her, warih, ranu, tirta, we, sindu.
6. Lsp
4. Ukara Langsung lan Ukara Ora Langsung
Ing sajrone crita kudu dimanfaatake anane ukara langsung lan ukara ora langsung. Ukara langsung iku panulise nggunakake tandha petik loro. Ditulis mlebu kaya dene pada/paragraf anyar.
Tuladha :
1. “Aku ora nate melu!” kandhaku banter.
2. “Taun iki kowe kudu munggah kelas, aja nganti kaya taun wingi!” ngendikane Pak Guru.
3. “Wetengku luwih tenan. Tulung aku golekna apa-apa kanggo ngganjel wetengku,” muni ngono karo nyekeli wetenge. Aku dadi mesakake banget.
Ukara Ora Langsung iku mung dicritakake bae apa sing diucapake. Panulise ora perlu tandha kutip. Ditulis padha kaya basa gancaran ing pada/paragraf.
Tuladha :
1. Aku mbengok banter lan ngandhani wong-wong mau yen aku ora melu.
2. Aku dadi kelingan ngendikane Pak Guru, yen taun iki aku kudu munggah kelas, ora kena kaya taun wingi.
3. Wong tuwa iku nyedhak karo nyekeli wetenge. Sabanjure dheweke ngomong yen wetenge lara sebab luwe. Dheweke pengin digolekake panganan apa-apa kanggo ngiseni wetenge sing keluwen iku.